یا رقیه (س)

دلا حدیث ولانی رقیه دن خبر آل
مقام اهل بلانی رقیه دن خبر آل
دئمه اوشاقدی بویوکدی مقام و مرتبه سی
حدیث قالو بلانی رقیه دن خبر آل
ائدر فلجلره درمان بو اوچ یاشیندا طبیب
نه دردون اولسا دوانی رقیه دن خبر آل
او خیردا بارماقی واللهی چوخ گره لر آچوب
کلید قفل دعانی رقیه دن خبر آل
آدی گلنده ئورک چیرپینار گوزیم آغلار
بو نای نیده نوانی رقیه دن خبر آل
سپاه زینبیلن گئتدی شامی فتح ائلدی
جلالت اسرانی رقیه دن خبر آل
دیورله شامه کیمی بیر دویینجا آغلامادی
نه حالدا تاپدی بابا نی رقیه دن خبر آل
گتوردی زینبی جانه او آخرین گئجه سی
شب فراق و عزانی رقیه دن خبر آل
طبقده گتدیله بیر دسته گل یتیم بالیا
طریق عرض و صفانی رقیه دن خبر ال
باخان کیمی تانیدی بیلدی قان حسین قانیدی
نئجه یووبدی او قانی رقیه دن خبر آل
دئدی بابا سنه بو منتظر گوزوم قربان
ئورکده درد نهانی رقیه دن خبر آل
غم دل اسرانی سورشما عممدن
ملال آل عبانی رقیه دن خبر آل
چخوبدی قرعه بابا بو گئجه منیم آدیما
نئجه ویریلابو جانی رقیه دن خبر آل
جانیم چخینجا بیر آز دردیمی گرک دانیشام
یارالی زخم زبانی رقیه دن خبر آل
یارالیام بابا دل یاره سی وروبلا منه
نهیب شمر و سنانی رقیه دن خبر آل
بو ساربان منی یولدا کجاوه دن سالدی
جفای اهل جفانی رقیه دن خبر آل
سارالموشام بابا از بس یوزمدن ئوپمه موسن
بهار فصلی خزانی رقیه دن خبر آل
بو خوردا سنیله من اوخشورام بویوک آناما
غم بتول جوانی رقیه دن خبر آل
یانا یانا دیمیشم سیلی آتدا یا زهرا
آناما نیلدی ثانی رقیه دن خبر ال
اونون قباله سی گئتدی منیمده گوشوارم
بو قور خولی جریانی رقیه دن خبر آل